政情：救救啟謙 「高歌」籲捐器官
十歲小三學生鄧啟謙不幸因擴張性心肌肥大致心衰竭，正喺瑪麗醫院深切治療部留醫，早前一度出現嚴重併發症，目前病情相對穩定，但仲要靠外置人工心臟「吊命」，換心係唯一治療方法。食物及衞生局局長高永文前晚出席電台音樂節目時，首度開腔唱民歌，呼籲公眾能支持大愛精神，讓垂危病者包括啟謙重過健康嘅人生。
謙稱「把聲似老牛」
高永文前晚出席電台音樂節目，邊唱民歌，邊宣傳器官捐贈訊息。佢笑言︰「平日上電台，都係被人質詢、解釋政策。喺電台唱歌都係第一次，都有啲唔習慣。以前都有跟人唱吓民歌。」佢喺節目中搭唱多首歌曲，如《那天再重聚》、《世事如棋》、《憑着愛》等，被主持人大讚聲線溫柔，佢即謙稱「把聲似老牛多啲」。
唱歌之餘，佢亦不忘呼籲公眾支持大愛精神，話香港每年有千名垂危病者亟需器官捐贈，當中包括啟謙，希望大家可以伸出援手，讓佢重拾健康、快樂嘅人生，並感謝社會各界推動器官捐贈訊息，讓大愛在社會蔓延。