政情：話唔再幫拖 「邵」禍躲不過
未完成宣誓嘅青年新政立法會議員梁頌恆、游蕙禎上周三硬闖立法會會議，令立法會六名保安員受傷。除咗民主黨（白鴿黨）兩名「乳鴿」議員許智峯同鄺俊宇當日有份協助游梁同保安員糾纏之外，專業議政嘅社會福利界議員邵家臻都有「幫拖」，佢日前解畫之餘，仲話「要做嘅已經做晒」，唔會再幫手嘞！之不過，全國人大常委會尋日就《基本法》宣誓條文釋法，邵家臻當日宣誓後拍打搖鼓，宣誓係咪無效仍有待商榷，幫拖變咗被拖落水，佢都自身難保喇！
其實喺衝擊議會後，白鴿黨當日隨即召開記者會批評兩名議員行為，該黨議員涂謹申翌日出席電台節目時，進一步炮轟游梁冇顧及他人安全，需受嚴厲批評同承擔責任，但係該黨許智峯同鄺俊宇當日亦有幫拖，故被網民炮轟該黨「精神分裂」。
所屬組織立場相反
除咗白鴿黨之外，專業議政成員資訊科技界議員莫乃光同教育界議員葉建源當日都有開記者會批評青政衝擊行為，但另一成員邵家臻亦有喺青政衝擊會議廳時幫拖，而佢喺嗰日並冇出席記者會。我哋事後問番佢，佢就解釋話專業議政唔係政黨，唔使要好一致咁講嘢，就算對全民退保都有唔同意見，佢認為毋須就青政衝擊見傳媒，所以就冇出席記者會。
稱為減少肢體衝突
跟住邵家臻又解畫，指青政第一輪行動佢幫拖，只係想減少佢哋同保安員嘅肢體衝突，而轉場後嘅第二輪行動佢自己並唔知情，仲講明喺青政宣誓一事上佢「要做嘅已經做晒」，唔會再幫手，但日後如有其他事件或議題就會再睇情況決定。聽佢咁講，好似覺得喺幫拖宣誓呢件事上已經仁至義盡嘞！
聽日立法會開大會，唔知游梁會唔會又再衝擊會議，但相信呢件事對邵家臻嚟講已經係次要，事關佢依家隨時自身難保。因為人大常委會尋日就《基本法》有關宣誓條文釋法，就連故意以行為、語言、服飾、道具等方式違反或褻瀆宣誓程序或儀式，都屬於宣誓無效。咁當日邵家臻喺宣誓完之後拍打搖鼓，可能隨時被踢走，幫拖變咗被拖落水，相信都係佢預料之外。