中環出更：高球勁耗體力 楊全盛打到中暑
高爾夫球有時會畀人感覺以為係年紀較大嘅人玩，香港軟件行業協會會長楊全盛（Eric）都曾經咁覺得，但後來就發現完全唔係。事關打高爾夫球需要好多體力，佢仲自爆人生第一次做運動中暑唔係因為打籃球或踢足球，而係喺滘西洲打高爾夫球喎。
話說Eric開咗個室內高爾夫球會，呢日開張唔少名人都去撐場，好似荔園主席邱達根同青聯副主席蔡德昇咁。講起最初以為高爾夫球好少後生玩，Eric話公司Sales帶佢去打過之後先知錯晒，令佢完全改觀，仲笑佢傾生意點可以唔識打，而一向熱衷運動嘅佢亦好快上手，依家連佢兩個仔都識打嘞！
蔡德昇見室內場好興奮
見蔡德昇行嚟行去好似好興奮，原來佢同邱達根以前都有玩高爾夫球，但自從家中有小朋友之後就甚少打，不過依家唔使驚喇，皆因佢話室內唔單止唔驚曬親老婆，個場仲有埋飛鏢機等設施，啱晒一家大細，最怕到時太太同三個小朋友一隊，凸咗佢呢隻腳出嚟啫！Eric太太Sophia仲好搞笑咁叫佢兩個平日可以上嚟攝時間，話兩手揈揈上嚟就得，手套、鞋同球桿都有得借。
Eric話早幾年因為收地令部分高爾夫球場結業，而佢吸取咗前人經驗後，發現太多教學班都會令生意下滑，因為好似健身咁，如果一心諗住畀咗錢先嚟上堂心情就係不情願嘅，亦唔會帶埋朋友一齊，相反佢哋依家唔單止引入外國國家隊訓練時都用嘅最新技術，配合跟隨實境移動的地台，令打高爾夫球時更貼近真實情況，仲同拍檔吳勝鑫合作喺場內擺放其他娛樂設施如飛鏢機等，豐富娛樂性，希望成為一班朋友嚟開心消遣嘅地方。
卓妮