俗語話「官字兩個口」，觀乎有啲高官將「狗噏」、「吊吊揈」掛響嘴邊，其中一個「口」可能係「粗口」；至於另一個「口」，肯定非「藉口」莫屬。唔係咩，每次爆親大鑊，官老爺例牌屙屎唔出賴地硬，唔係環境嘅錯，就係天氣嘅錯，總之就自己冇錯，簡直離晒大譜。
好似港珠澳大橋香港段咁吖，動工以來一波三折，意外頻生，搞到工程一再延誤。最新嘅甩漏係連接大橋香港口岸嘅赤鱲角至屯門連接路工程出現延誤，未能配合大橋同步通車，至於工程延誤，路政署話係因為「施工環境比較複雜」，又話承建商進行海底隧道鑽挖工程時，遇到嘅岩石比預期硬，而面對嘅水壓亦比較大喎。
聽吓市民點講喇。「東方報業民意調查」顯示，大部分受訪者狠批當局前期勘察工程不足，官僚只識砌詞狡辯，為施工馬虎推卸責任。正如有人話齋，香港係臨海地區，海底隧道都起過咁多條，相關挖掘工程經驗豐富，可見所謂岩石同水壓問題，只係無嘢講搵嘢講。仲有吖，大橋珠海同澳門段夠多工程技術困難喇，點解人哋又進展順利，港產官僚係咪應該戙高床板好好反省吓呢？
話時話，港珠澳大橋貴為國家級重點基建工程，點知畀香港段猛拖後腿，為免淪為「國際級笑話」，兩地焗住「等埋香港」，堅持同步通車，簡直累人累物累街坊，咁就難怪大部分受訪者批評港府後知後覺，未能及時發現問題，加上無應變計劃，以致追唔番進度。
講起就把幾火，港珠澳大橋工程拖到依家，造價不斷飆升，累計超支逾二百億元，大橋本身、香港接線再加上屯門至赤鱲角連接路，整體工程耗費認真襟計。不可不知，武漢天興洲長江大橋作為全球跨度最大嘅公路鐵路兩用斜拉橋，造價都係一百三十億港元有找，可想而知港珠澳大橋香港段超支有幾誇張。家陣最慘嘅係，除咗港珠澳大橋有機會淪為財政無底洞，包括高鐵在內嘅多條鐵路亦因為港府監管不力而出現延誤超支，以致出現「五鐵總遲，橋路不通」嘅荒謬局面，呢度超支幾十億，嗰度超支幾十億，庫房識印銀紙都唔掂喇。
當然喇，大型基建拖拖拉拉，浪費公帑仲係其次，錯失發展機遇先至大鑊，呢方面，港珠澳大橋正正係最突出例子。當年香港貨櫃碼頭一枝獨秀嘅時候已經有人提出興建大橋，奈何之後港府議而不決，蹉跎歲月，好嘞，依家香港物流業早就無復當年勇，大橋落成分分鐘變明日黃花。上述民調顯示，唔少受訪者擔心多項基建發展均延誤超支，會削弱香港整體競爭力。唔係無的放矢o架！