政情：公民講場：公園監獄化 保安守滑梯 網民斥滑稽

香港公園兒童遊樂場長滑梯舊年初損壞，康樂及文化事務署以無合適零件更換及維修為由拆卸，經市民強烈爭取後，康文署終重置滑梯，並喺本月初開放，但呢個四米長及四米高滑梯嘅保安好嚴密，一條滑梯設有兩名保安人員駐守，佢哋會查問兒童嘅年齡，亦會作人流管制，從事文化評論嘅胡恩威就喺社交網站批評公園「監獄化」，有網民亦笑言：「守滑梯，夠滑稽！」好明顯係炮轟康文署署長李美嫦好做唔做喇！雖則署方覺得要加強保護小朋友嘅安全，咁就應該出嚟講清楚，而唔係貼張告示就算。