政情：瑩春惜花 送贈社福機構
香港青年聯會前副主席兼亞太創惠學院創辦人黃夢瑩（Monin）近年專心搞社會企業，繼舊年喺校園內成立社企咖啡店之後，最近又有新搞作，就係等城中各大喜慶婚宴曲終人散後，將依然完好嘅鮮花分送到安老院等社福機構，呢個咁有意義嘅活動名為「花在當下」。
嘆環保概念難成氣候
Monin話經常呢頭着得靚靚做賓客，轉頭就換上便服漏夜做搬運工人。雖然做到周身骨痛，但見到收花嘅公公婆婆同小朋友們露出歡喜笑容，幾辛苦都值得。
為咗掌握更多鮮花嘅流向，增加回收鮮花數量，Monin諗緊進一步擴大業務內容，早前特別向香港鮮花盆栽批發商會主席賴榮春請教。身為花墟老行尊嘅賴榮春笑笑口話，晚宴後嘅花籃確實多數被當垃圾丟掉，好可惜。曾經有人試過租樹、租花，雖然環保概念唔錯，可惜最後都難成氣候，佢盛讚「花在當下」好有創意添！