政情：黨友「豆膶」辦事處開幕 卿姐撐場
區議會選舉已經過咗接近一年，民主黨（白鴿黨）北區區議員劉其烽（阿烽）嘅辦事處竟然喺尋日先正式開幕。幾經辛苦先覓得辦事處嘅阿烽，仲邀得該黨主席劉慧卿同立法會議員林卓廷撐場，卿姐一見到房署代表仲即時為阿烽抱不平，話房署安排不善搞到阿烽要用個「豆腐膶咁細」嘅辦事處，要求房署加快處理申請添！
代劉其烽向房署申訴
卿姐尋日無去民陣發起嘅反釋法遊行，反而去咗阿烽嘅辦事處開幕，認真畀面。卿姐話黨內有分工，既然有黨員去咗遊行，咁佢就負責其他活動。講到阿烽嘅辦事處，卿姐形容係「有血有汗」，事關未有辦事處之前，阿烽日曬雨淋擺街站，日日畀蚊叮到血都出埋。佢大鬧房署安排不善搞到阿烽目前要租用大廈法團「豆腐膶咁細」嘅地方，期望房署可協助阿烽喺天平邨搵到個房署單位做辦事處。
自稱卿姐「粉絲」嘅阿烽好開心見到卿姐嚟出席辦事處開幕。佢話之前房署曾經叫佢改裝垃圾站做辦事處，好在有屋苑法團見佢咁可憐，就出租咗約一百呎、本來放雜物嘅地方畀佢。佢希望有新辦事處之後可以有地方畀街坊聚腳，但佢唔會放棄日曬雨淋擺街站，可以有更多時間見街坊。