政情：選委戰轉捧傘兵 李國麟賣甩護協

三十個藥劑師、護士、物理治療師、臨床心理學家、放射治療師等組成嘅「衞‧真普30」尋日開記者會宣布出選衞生服務界，其中二十九個係初哥，只有本身係民主黨成員嘅馬旗曾參選選委。發言人列明慧話「衞‧真普30」係唯一獲民主派支持嘅名單，佢哋要求重啟政改、推動雙普選、守護香港核心價值、尊重三權分立及改善醫療政策等，目標係全取三十席。若成功當選，會綑綁投票，投票意向暫時未決定，唔排除投白票，但堅持唔會支持特首梁振英連任。「衞‧真普30」又話，議員李國麟已表明會支持佢哋出選。

稱護協曾開會 但無派人出選

不過，喺上屆選委會選舉，本身係護協主席嘅李國麟，明明係支持護協名單o架喎，有人就質疑李國麟今次係食兩家茶禮，傘兵同護協都支持，睇吓邊度有着數。李國麟接受查詢時就否認，佢話過去選委會選舉佢都會牽頭討論，協調業界，但強調護協一直都無派人出選，直言「佢哋以咩名義參選唔到我決定，可以肯定所謂名單無通過會員大會，一定唔係護協支持。」至於今次疑似護協名單，李國麟就承認有耳聞，但就話佢哋開兩次會都唔齊人，又好似傾唔成咁，所以佢都無再理喇！

衞生服務界選委過往多建制

其實，衞生服務界一直係一個好吊詭嘅界別，事關每屆立法會選舉都會由民主派人士當選，但係去到選委會選舉，大部分議席都落入建制派口袋，上屆衞生服務界更有好多選委提名咗梁振英。有人就話原因係投票率低，衞生服務界民主派選委候選人嘅選擇亦唔多，估計今屆多咗選擇，會令情況有所改變，唔知「衞‧真普30」喺李國麟加持下，係咪真係可以大獲全勝呢？仲有半個月就可以揭盅喇！