中環出更：辣招遏市 劉燊濤夫婦買樓Hold住先
政府再出辣招遏抑樓市，港人購買第二個、或非港人購買住宅物業的印花稅加至百分之十五，被指是歷來最辣嘅一次。尋日卓妮喺沙田馬場見到一班城中名人，唔知又有冇影響佢哋買樓嘅意欲呢？香港工業總會青委主席劉燊濤（Gary）就話其名下冇物業，反而太太吳奕筠就有，話加辣都冇辦法，暫時都唔買住嘞！
買樓收租嘅成本貴咗，咁佢哋會唔會將資金轉投舖位或車位？Gary就話唔係唔會，因為舖位同車位都貴，但就會考慮將資金放落股票度，事關佢外父係做呢瓣，佢不時都會向外父請教投資策略，所以唔使驚咁話。
嚴玉麟籲儲錢買物業
同場仲有仁濟副主席嚴徐玉珊與老公嚴玉麟及兒子，不過政府再加辣對佢哋似乎影響就不大，事關佢哋平日都係投資喺工廈寫字樓多，住宅較少。咁唔知政府加緊規管工廈用途又有冇令投資工廈嘅佢哋多咗顧慮？嚴玉麟就認為唔會嘅，反而認為投資舖位風險仲大，因為舖位好受個零售市況影響，唔同行業嘅舖位又可能有所不同，至於股票又未必靠得住，所以大家都係一齊儲錢買樓喎！佢仲話個仔已經有物業，所以今次辣招對佢應該影響不大喇，又認為投資磚頭唔會冇咗，但長遠銀紙就會貶值咁話。
至於中總副會長楊華勇（Johnny）及太太莊菲娜（Fiona）亦有現身，講起Johnny都有兩個小朋友，但佢話依家兩個小朋友年紀都太細，唔會咁早買樓畀佢哋，所以辣招對佢唔會有影響住，仲笑言應該係兩個小朋友第日買番樓畀佢哋住先啱喎。
卓妮