辣跑「飄移」自炒 車Cam直擊
【本報訊】午夜辣跑「飄移」自炒，車Cam直擊驚心一幕！前晚十一時許， 一輛辣跑沿大埔吐露港公路快線往沙田行駛，途至科學園對開時，跑車突然失控甩尾，如玩「飄移」衝過鄰線，再猛撼路中石壆，繼而反彈打「白鴿轉」，橫亘路中。期間，一輛貨車從後駛至，幸司機及時煞停，避過撞向跑車，情況極為驚險。
稱避車失控 司機無受傷
肇事跑車車頭嚴重毀爛，姓羅（廿三歲）司機無受傷，並落車查看車輛損毀情況。據目擊者表示，一輛相信是同行跑車亦停下，司機落車協助。警方接報到場，有人向警員聲稱因要閃避其他車輛，導致切線失控。
至於肇事經過有車Cam拍攝，目擊事件司機及乘客全程「肉緊」，嘩聲四起，並指：「巴閉囉，呢啲咪死囉，揸咁快！」片段被上載至社交平台，引起網民熱議，有網民留言稱：「乾地、直路、冇車推、三線任揸、冇快相嚇都攪（搞）成咁，好彩冇累到其他人……」又有人指涉事車輛均掛「T」牌（試車）。
