政情：選舉裁決「成名」 何麗嫦離任民政專員
喺立法會選舉中裁定梁天琦同陳國強提名無效而「成名」嘅新界東選舉主任何麗嫦，聽日將離任沙田民政事務專員一職，佢尋日喺沙田區議會地區管理委員會仲向區議員派「散水餅」添！民政事務總署回應稱，何麗嫦調任政務司司長辦公室轄下嘅項目策劃辦公室，並強調係恒常調動。
沙田區議員容溟舟喺Facebook上載「散水餅」嘅相，佢對於何麗嫦喺立法會選舉期間兼任新界東選舉主任時所作嘅決定不予置評，但佢認為對方喺帶領民政事務處方面，作出咗不少改善同改進。
曾接刀片恐嚇信
何麗嫦早前兼任立法會新界東選舉主任，期間以未能信納「本土民主前線」發言人梁天琦同沙田區議員陳國強改變政治立場為由，裁定兩人提名無效，引起社會激烈討論。佢之後三度收到恐嚇信，亦試過分別收到附有刀片同白色粉末嘅信件，信中批評佢阻撓選舉。