中環出更：菲傭唔使抹窗 名人頭痕
早前菲律賓駐港領事館要求喺菲傭新合約內加入唔使抹窗嘅條款，獲暫緩實施一個月再作商討，但日前又被發現上月底曾提出僱主必須向菲傭硬性支付膳食津貼嘅安排，日前卓妮喺一個活動上見到一班名人，佢哋似乎都相當關注事件，愛沙尼亞共和國駐港名譽領事林建康同太太林黃寧艷話膳食費一向都額外畀，但唔畀抹外窗呢樣嘢就麻煩啲喇，話如果明明冇危險嘅外窗都唔畀抹，都唔知點好喎。
原來林建康同太太林黃寧艷對外傭有一套相當奏效嘅管理方法，淨係睇佢哋家中菲傭最耐嗰個做咗超過十年，其次都做咗足足九年就知。林太話，家中有兩個做得比較耐啲嘅菲傭，可以負責介紹親戚入嚟做兼教埋佢哋，加上佢哋有好明確嘅分工同指示畀幾位菲傭，連是但一個放假時工作點安排都一早定晒，真係諗得非常周到。但講到有機會唔畀外傭抹外窗嘅問題時，佢哋就相當關心，擔心萬一實施之後連本來只需行出門口就抹到嘅獨立屋外窗或落地玻璃都唔畀抹，咁就頭痕喇！
史立德憂保險唔賠
廠商會副會長史立德同太太史顏景蓮亦在場，佢哋認為正常僱主都唔會要求外傭做危險動作，事關大家都希望安全嘅，但萬一真係實施有關條款，就有問題出現，好似一啲露台嘅窗又唔畀抹，保險又唔會再包有關嘅受傷或意外，萬一外傭真係自己抹咗個外窗受傷就冇咗保障喇，至於膳食方面佢哋就一向另外畀，所以影響唔大。
同場仲有廠商會副會長吳清煥一家，佢話以前都請過菲傭，但依家就係印傭，加上佢哋住三十幾樓，大廈有定期安排清潔公司抹外窗，因此影響唔到佢哋。
卓妮