廣東話有句俗語「屙屎唔出賴地硬」，呢句說話形容港產官僚最貼切不過。呢，話口未完又嚟料，港珠澳大橋香港口岸配套工程又有延誤，至於今次嘅藉口，之唔係例牌菜嘅「技術困難」囉。
路政署尋日傍晚發新聞稿，話連接港珠澳大橋香港口岸人工島嘅屯門至赤鱲角連接路南面以及北連接路嘅工程，存在技術困難，工程壓力非常大，其中南面連接路未能如期與大橋同步通車，至於北面連接路，同樣未能夠喺二○一八年通車咁話。
到底咩「技術困難」咁巴閉呢？由於路政署講到水蛇春咁長，功夫茶淨係列舉部分例子。南面連接路方面，承建商要喺緊迫工期內灌製約二千六百件巨型橋面預製混凝土組件，並且要遵守機場高度限制；至於北面連接路嘅海底隧道，就因為海底岩石硬度比預期高，水壓大，為鑽挖工程增添難度咁話。
你話係咪笑大人個口吖。路政署上述所謂嘅「理由」，唔係今時今日至知，好似話要遵守機場高度限制咁，機場又唔係尋日新起，唔係一早就知嘅咩？又好似話海底鑽挖面對堅硬岩石咁，工程前期論證階段亦應該一早預計埋，根本冇可能事到臨頭至如夢初醒。路政官僚要搵藉口，唔該都搵個似樣啲嘅，唔好咁低B好唔好？
如果講到技術困難，內地負責嘅大橋珠海段堪稱第一，但人哋克服重重困難，進展順利；澳門段一樣困難o架，工程仲一度出現阻滯添，但人哋勝在一早有晒應變計劃，好快就追番進度。所以話啫，唔怕唔識貨，最怕貨比貨，大橋香港段一拖再拖，隨時出現「等埋香港」嘅笑話，講到尾唔係因為香港段工程難度最高，而係本港官僚能力最低咁解啫。
講開又講，港珠澳大橋香港段一波三折，好事多磨，可以話係「香港速度」嘅特色；而賴嘢後官老爺賴天賴地，怨天尤人，諸多藉口，則可算香港官場嘅獨特文化。大家有眼睇，高鐵工程延誤，港鐵方面賴黑雨毀鑽挖機；訪港旅客跌跌不休，卡片局長蘇錦樑賴天氣唔好影響旅客心情；家陣港珠澳大橋連接橋延誤，又話乜嘢高度限制、海水壓力。千錯萬錯，都係別人嘅錯，天氣嘅錯，環境嘅錯，官老爺從來唔會自我反省，你話點可能做到嘢吖，點可能唔烏龍百出吖。
始終都係嗰句，有錯要認，打就企定。乜路政官僚冇聽你哋老闆教落，the buck stops here，責任到我呢度為止嘅咩？計功夫茶話齋，其實要追趕進度唔係咁難嘅啫，只要將官老爺嘅人工福利同埋基建進度質量掛鈎，咁就得嘅嘞！