政情：退修營打機 電競聰揮低黃之鋒
香港眾志（眾志）日前搞咗個退修營，為立法會選舉賽後檢討。眾志秘書長黃之鋒前晚喺facebook貼咗佢同立法會議員羅冠聰（Nathan）對戰嘅相。Nathan喺進身立法會前曾任電子競技比賽嘅評述員，亦有「電競聰」稱號。黃之鋒尋日再貼出賽果同片段，指自己得十五萬分，輸畀Nathan。
為期三日嘅退修營，除咗檢討，仲會討論未來部署。不過，退修還退修，相信「吊頸都要抖下氣」，黃之鋒同Nathan趁有機會，就對戰音樂遊戲《太鼓之達人》。前晚已有疑似營友貼出戰果，Nathan攞成超過四十萬分，擊中率仲達到百分之九十九，得分超出黃之鋒嘅一倍。有網民仲大讚Nathan，話佢「果然係電競聰，炒足廿幾萬」。
黃之鋒亦貼出對戰嘅片段，見佢打機時仲落力過Nathan，但Nathan由頭到尾都面不改容，結果輕輕鬆鬆就贏咗。難怪喺出咗結果後，黃之鋒大叫「點解你高我咁多，冇理由o架喎。」其實連黃之鋒都知Nathan係以打機做興趣，訓練有素，如果贏唔到佢先係奇呀！