政情：丁權受挑戰 鄉議局反擊白鴿黨

鄉議局主席劉業強喺記者會上批評，出言要求廢除丁權嘅人係別有用心、挑起矛盾，對解決香港居住問題同撕裂更係有害而無利咁話！佢重申，男性原居民擁有丁權同丁屋政策都係有充分嘅歷史根據，而原居民嘅傳統合法權益更受《基本法》第四十條所保障，希望政府能夠向全港市民解釋，亦為原居民釋除疑慮。

狠批調查欠科學及理據

劉業強更將矛頭直指白鴿黨，表示任何具影響力嘅政團公開表達意見時，都需要有充分理據同事實基礎，並以增強公眾理性討論為目標，而唔係斷章取義，以及利用傳媒公器去謀取政治本錢！而鄉議局研究中心主任薛浩然亦都鬧埋一份，認為白鴿黨正協助市民入稟挑戰丁權問題，所以報告係有預設立場，佢亦批評調查方式欠缺科學同理據，並唔客觀咁話！

冇幾耐，尹兆堅又反擊，指白鴿黨嘅民調樣本數目算係相當高，質疑鄉議局因為「唔鍾意」民調結果，就批評民調唔科學，仲話若果喺調查中充分解釋丁權問題，反對丁權嘅數字肯定更高。