政情：阿王萬聖節去廉署「捉鬼」
「23萬監察」發起人、工聯會立法會前議員王國興（阿王），趁尋日係萬聖節到廉政公署遞信，要求廉政專員白韞六「捉鬼」，保住「廉署保密、密密實實」嘅金漆招牌。
憂林卓廷收風爆料屬洩密
之前因為李寶蘭被取消署任廉署執行處處長，之後仲引發廉政「地震」，做過廉署調查主任嘅民主黨林卓廷搵番啲舊同事收風爆料，前前後後引述多次「來自廉署相當高層的消息」，誓要同李寶蘭伸冤！就因為佢連番引述內部消息，惹起外界批評，擔心廉署內部洩密，私隱不保，由屯門前區議員陳雲生牽頭嘅全城捉鬼大聯盟，之前就趁鬼節帶隊去廉署抗議，要求白韞六捉「內鬼」。
阿王都覺得林卓廷呢種做法好唔妥當，尋日就去廉署舉報，話有人違反廉署保密行事原則，將廉署向特首辦索取UGL案嘅資料，同廉署內部討論案情嘅細節繪形繪聲咁爆畀林卓廷，要求白韞六追究林卓廷嘅消息來源同掃除「無間道」，擺明係叫白韞六捉內鬼喇！
雖則阿王依家唔係立法會議員，但佢話自己仍然好忙，繼續「7.11」，即係朝七晚十一。佢仲透露，呢排好多街坊叫佢要預備補選，又話自己會積極考慮，但都要睇下工聯會有乜嘢意見先咁話喎。