政情：會計女 I T男 姻緣一線牽
唔少專業人士為咗喺工作上搏殺，都冇時間理其他事，例如係自己嘅感情生活。青年專業聯盟尋日發布一個有關青年會計師嘅調查發現，唔少年輕女會計師因為工作忙而單身，聯盟打算舉辦跨界別聯誼活動，介紹資訊科技界嘅宅男畀佢哋認識添！睇嚟作為呢兩個業界嘅立法會議員嘅梁繼昌（Kenneth）同莫乃光（Charles），應該更加着緊啲撥行把大葵扇，幫下班單身男女喎。
聯盟喺九月至十月進行調查，訪問咗三百位四十歲以下嘅青年會計師，近七成青年會計師係單身，當中有七成係女性。聯盟指出，年輕會計師工時長，工作環境較獨立，人事關係較孤獨，加上畢業後需要花幾年讀書考取專業資格，接觸社會機會較少，正如資訊科技界有唔少宅男，工作主要對住電腦，所以聯盟打算安排一啲機會「撈埋佢哋」，包括速配約會（speed dating）同試酒會等，安排會計界、資訊科技界及測量界等人士一同聚會，至於以往有冇成功例子？聯盟笑指「撈得埋就實有，就算我哋知都唔方便講好多。」
聯盟會計界副會長楊志達話年輕女會計師因為有專業資格，所以好有興趣同專業人士傾偈，認識其他界別，笑住咁話識完都唔敢跟進，因為要畀多啲空間佢哋，「到時收到帖就知喇嘛」。聯盟教育界會長陳繼宇都自爆，自己妹妹就係從事會計，妹夫就係從事資訊科技。
梁繼昌指同行工時長難約會
會計界議員梁繼昌被問到點睇聯盟嘅建議就話，會計界女仔未必鍾意從事類似工作性質，例如成日坐枱、較靜態工作嘅男性，反而可能會鍾意啲主動啲嘅男仔，例如設計師、飛機師，覺得有新鮮感同刺激啲，冇咁悶，但佢又大嘆女會計師工時長，冇咁早放工，未必去到speed dating喎！
莫乃光強調IT界唔一定係宅男
至於資訊科技界議員莫乃光就馬上回應「呢啲嘢唔係我專業，唔識答，唔扮專家」，但首先就澄清從事資訊科技唔一定就係宅男，又提到資訊科技界同會計界都有很多合作，舉例話依家有關資訊保安及大數據等科技，與審計等範疇都有關係，相信兩者最少都可以傾下公事。被問到有冇試過用科技追女仔，Charles就重申自己唔會扮專家，因為佢老婆都係讀電腦o架！