中環出更：做機師太刺激 洪文正寧揸船
參加制服團體除咗可以訓練團隊精神，仲會帶嚟好多難忘回憶。卓妮早前喺「第二屆香港青年服務領袖獎」頒獎典禮上見到唔少政商界名人，原來佢哋好多都曾經參加過制服團體，好似香港新興科技教育協會創會主席洪文正咁，年輕時就參加過航空青年團，為嘅係可以一嘗飛行滋味，不過佢參與訓練三、四個月之後覺得太辛苦同頂唔順，最終出嚟做嘢之後先第一次試飛，但指刺激得滯，都係揸番船算喇！
洪文正話當年參加制服團體每個星期都要步操，太辛苦喇，所以最後放棄咗，但後來喺專資會朋友介紹下有機會試飛，但感覺太刺激唔啱自己，都係揸船有信心啲，而佢現時有同朋友一齊玩帆船，所以嚟緊都諗住考番個大偈牌。
林思俊難忘坐戰機急降
其實「想飛」嘅又豈止佢，籌委之一嘅林思俊亦曾一樣，喺讀書時參加過英國皇家空軍航空少年團，有機會坐上小型戰機進行飛行體驗，仲記得身旁教官見佢唔敢有太大動作，就專登拉手掣操控架機急降，嚇到佢今時今日都記得好清楚呀！
講番呢日頒獎禮除咗創辦人黃仰芳同聯合創辦人林月萍之外，仲有食物及衞生局局長高永文、菁英會榮譽主席洪為民、香港總商會總裁袁莎妮等。林月萍細個時係女童軍，除咗覺得制服靚之外，對於考章更係樂此不疲，認為參加女童軍就好似做風紀同班長咁，係童年投入參與過嘅深刻回憶。
加入交通安全隊約二十年嘅洪為民就笑言細個冇參加，依家大個先補番數。至於早前因傑青風波而被關注嘅黃仰芳，就希望能以行動持續參與社會服務，令大家更了解佢為年輕人服務嘅心。
卓妮