中環出更：嘩鬼派對 許華傑自爆細膽
今日係萬聖節，係嘩鬼出籠嘅日子。香港白雲聯會一班青委日前亦舉辦萬聖節派對開心一番應吓節，並化身成各式造型鬼怪，不過卓妮見聯會副會長許華傑（Michael）就冇一齊變裝，佢笑言淨係得鬼唔好玩，所以佢要扮受害者喎！
查實呢日白雲聯會青委會有個講座，而Michael就負責做演講嘉賓，咁啱佢哋有個會員嘅朋友做電影化妝，所以就到場同大家化個妝玩吓。Michael仲大爆自己好細膽，細個入荔園嗰啲鬼屋都會覺得好驚，相反佢啲小朋友就大膽得多，之前一齊去迪士尼樂園嘅鬼屋，小朋友好興奮，但身為爸爸嘅佢就算驚都要企最前面咁話。佢仲話最憎睇鬼片同聽鬼古，事關佢經常一個人出trip，夜晚獨自喺酒店又習慣熄晒燈瞓，所以早年都仲會帶住媽咪畀佢嘅十字架鏈喺篋度（口架）！
楊華勇「古堡」招呼賓客
另一邊廂清水灣都出現咗一班嘩鬼覓食！事關廠商會青委每年都會喺常務會董楊華勇（Johnny）嘅清水灣大宅家中搞大閘蟹宴。繼早兩年扮過蝙蝠俠同海盜後，出名鍾意一身全黑打扮嘅Johnny今年同太太莊菲娜同小朋友就扮吸血殭屍家族，喺佢哋個「古堡」招呼客人，維肖維妙又貫徹佢一向鍾意黑色嘅形象。佢仲話最初同太太驚扮吸血鬼嚇親小朋友，點知兩個小朋友着起套衫之後即刻影帝上身，裝模作樣嚇人好搞笑。
卓妮喺另一個場合仲見到民政事務局副局長許曉暉，同樣有小朋友嘅佢就話因為佢哋讀基督教學校，所以冇特別慶祝萬聖節，而佢細個嗰陣時就未興呢啲嘢，淨係會聽電台講鬼古，不過佢話夠正氣就唔會驚，鬼古呢啲嘢嚇佢唔到嘅！
卓妮