康文署公園限制多多，唔准踐踏草地、唔准踩單車、唔准踢波，連小朋友吹泡泡都要阻止，偏偏對嗰班每日開大喇叭搵真銀嘅band友，職員居然隻眼開隻眼閉，唔通又係欺善怕惡，驚咗對方人多勢眾？
話說土瓜灣海心公園係呢班band友嘅其中一個搵食場地，歌女獻唱後收利是，大家早就見怪不怪。唔知係咪避免被投訴索取金錢，band友們最近變招，改為以「賣水」為收錢幌子。本報記者連續多晚直擊發現，多名濃妝艷抹嘅性感歌女，向公園內長者大施嗲功放電，收取二十元購買飲品，乖乖就範嘅固然無任歡迎，稍有不從者，同黨即時圍埋起哄，有長者不勝被苦纏，最後選擇離開公園。其實當時場內保安近在咫尺，但就好似睇唔到咁，完全冇出手干涉。
最離譜嘅係，對於有關擾民亂象，康文署仲一味喺度死撐，話場地職員如接獲曲藝活動對公園遊人造成滋擾嘅投訴，又或者發現有人喺公園內售賣商品，勸喻無效兼有足夠證據下，會採取執法行動喎。家陣有人好似攞正牌咁喺公園叫賣，傳媒亦影到相關片段，點解當局仲可以無動於衷呢？
有人就質疑得啱嘞，呢班歌女獻唱只係藉口，「賣」一支三幾蚊嘅水，居然夠膽死收廿皮，人哋唔畀就圍人，咁搞法即使唔係搶，亦同行乞冇乜分別。係人都知，公眾場所行乞係違法行為，最重可判囚一年，當局係咪要管一管？仲有吖，聽番片段，班歌女普通話字正腔圓，會唔會涉及非本港人士非法工作牟利？如果水貨客要嚴打，又有乜理由放過呢班疑似內地大媽？
其實即使撇開叫賣呢筆唔講，喺公園熱烈地彈琴熱烈地唱，本身亦係好大問題，表演嗰個就話過癮咯，附近街坊飽受噪音滋擾，當局冇理由坐視不理？不過嘥氣喇，除咗土瓜灣海心公園，喺屯門公園等重災區，曲藝人士咁多年嚟同居民不知爆發過幾多次衝突，弊在當局闊佬懶理，既唔肯修改法例，限制曲藝人士攜帶音響器材入園，亦懶得提供場地畀佢哋租用，康文署官僚連呢類舉手之勞都唔做，簡直白支人工。
當然喇，康文署官僚出名胡混度日，除咗公園管理不力，轄下運動場地年久失修，訂場安排漏洞多多，博物館設施落後，真係多到天光都數唔完。
冇計喇，呢個政府就係咁嘅嘞。同市民接觸愈多嘅衙門，烏龍甩漏嘢愈多，引發嘅民怨亦愈大。康文署係咁，食環署、香港郵政、警隊等通通都係咁，港府成日畀人話大事做唔到，小事做唔好，家陣知點解喇。