今屆政府除咗房屋政策係重中之重，勞工同福利議題亦係主打項目。尋日勞工及福利局局長張建宗話，今年政府預算畀勞福局嘅開支比佢上任之初時增加咗百分之五十五，仲好自豪話其他局長都有啲不滿喎，即係眼紅佢囉。
不過呢，張建宗上任呢四年幾嚟，標準工時同強積金對沖仲未解決，最近仲爆出「康橋之家」事件，執掌相關範圍嘅勞福局實在難辭其咎，難為佢手上有咁多資源都搞成咁，係咪應該感到慚愧至啱呢？
