政情：外地做生意 吳傑莊靠政策保護
一帶一路政策下做生意，原來係增添保護！香港青年聯會主席吳傑莊提到，以前曾去土耳其賣人臉識別技術畀一啲大廈做保安工作，雖然已經係賣畀集團式嘅代理，但係都好驚佢哋冇數找，好彩最後都攞得番錢，依家有一帶一路政策保護就有信心好多。
吳傑莊話，喺一帶一路政策下，做生意有保障，即係有國家保護同出頭，「如果冇人出頭，做咗生意攞唔攞到錢走先？」政策下會夠膽去做。至於去呢啲國家做生意、合作同交流，基本英文都足夠，亦要對宗教有基本認識，「買本旅遊書睇睇其實都唔會有問題」，其中一樣要留意嘅係，宗教會影響當地假期。
佢又話，青聯年底會推出計劃，畀十八至三十五歲嘅年輕人申請資助路費，認識一帶一路國家，預計整個計劃涉及幾百萬元，供數百人申請。被問到會否擔心被人覺得係派錢買人心，佢就話，香港人做任何嘢都有人批評，只要認為自己做嘅嘢係正確就得嘞。