政情：政制局搵政助 黃梓謙請食檸檬
立法會選舉之後，唔少敗選嘅人都要回復原先工作，但港島區落敗嘅民主思路理事黃梓謙（Gary）就似乎唔憂做喇，完咗選舉仲放咗個長假去外地散心添。有人就爆料，話Gary眼角高，曾經有政府中人搵過佢出任政制及內地事務局政治助理（政制局政助），佢都拒絕。
有政圈中人爆料，指去年中政制局政助陳岳鵬升任副局長時，曾經有政府中人搵過Gary頂替陳岳鵬嘅政助工作。不過，當年Gary剛剛加入民主思路，更加雄心壯志預備緊選舉，所以拒絕邀請。Gary拒絕邀請之後，政制局政助個位就一直懸空，未知Gary係咪政府心目中嘅「唯一」，又或者係同現屆政府就嚟任滿有關。老實講，就算Gary肯應承做政助，任期都只係一年半載，計落都無咩着數，下屆政府明年五月就開鑼，唔知道Gary到時會否有另一想法呢？