政情：新同盟失「威水」 焗區議員填氹

其實各政黨除咗依賴捐款之外，另一個財政來源就係來自黨內嘅立法會議員同區議員嘅薪金上繳。據了解，本來象徵性向黨內區議員收取每位五百元上繳嘅新同盟，上屆區議會後已經將區議員薪金上繳倍增至每個月一千元，去應付黨內日常開支。本來制度一直行之有效，但就因為有兩個黨員參選立法會，而將黨內日常開支用盡，而兩人全軍盡墨，更令財政上現「乾塘」危機。

有傳上繳曾掀退黨潮

無咗立法會議員嘅薪金支持，惟有向區議員埋手喇！有該黨區議員爆料，指黨內財政情況唔理想，長遠真係要檢討成個上繳制度，否則黨內支持唔到落去。但爆料者同時話，曾經有人因為上繳問題搞到退黨，擔心有機會重蹈覆轍。另一議員話，黨內暫時未有關於上繳嘅討論，但認同咁多人走咗，加上繳亦無可厚非。

公文袋亦有類似商討

至於公民黨（公文袋），雖然冇財政問題，但就因為今屆區議會選舉報捷而考慮加入區議員薪金上繳制度。有該黨中委建議，區議員向黨自願上繳十分之一薪金，主要用作地區發展。該黨秘書長賴仁彪解釋，呢個唔係一個上繳制度，而係「一對一配對」計劃，建議區議員每人每月拎出約二千元做地區工作，而黨內亦會提供同樣嘅金額做補助。佢強調，並非硬性規定黨內區議員參與，事關其他政黨曾經因為遲交上繳問題喺黨內引起爭議，該黨都唔希望搞成咁。

不過，所有上繳制度都係要班區議員霎時間減一截人工，並唔係人人可以接受，更加有唔少政壇中人認為，上繳制度係令好多人選擇獨立身份嘅原因。究竟照辦煮碗搞上繳，甚至加大上繳金額，怕唔怕會令人才流失呢？