中環出更：漢奸黎人神共憤 童叟皆示威
壹傳媒黎智英（漢奸黎）被揭發多次秘密捐款畀泛民政團同立法會議員，又參與違法佔領行動，被批評為佔領行動幕後黑手同金主。尋日再有一批市民到漢奸黎寓所外示威，炮轟漢奸黎係「漢奸走狗」，顛覆香港，破壞經濟，搞亂社會，不滿漢奸黎至今仍未受法律制裁，要求當局早日將佢繩之於法。
尋日朝早十一點半鐘，約二十名人士聲稱自發到漢奸黎位於何文田嘅寓所外示威，當中仲有年僅三歲嘅小朋友。佢哋手持印有「反黑金、反港獨」同漢奸黎樣貌嘅橫額，一字排開企喺漢奸黎寓所門外，仲高叫「漢奸走狗」等口號。
示威者促制裁保法治
示威人士直言不滿漢奸黎顛覆香港，而前年佔領行動至今，漢奸黎仍未被繩之於法，認為佢應該要受法律制裁，否則本港法治蕩然無存。佢哋逗留至約中午十二時就和平散去，直到下午二時又再折返示威，期間仲怒撕印有漢奸黎樣貌嘅紙牌，逗留咗半個鐘先至再離開。
自六月十日起，喺漢奸黎寓所及將軍澳壹傳媒大樓外嘅示威最少有六十九次，當中自稱係霸王國際集團員工及苦主嘅佔十次、正義聯盟佔三次，旅遊業界及其他人士就有五十六次。
卓妮