中環出更：文武廟秋祭東華人穿「古裝」
每年呢個時候東華三院（東華）都會喺文武廟舉行奉祀文武二帝秋祭典禮，秉承過往傳統祈求風調雨順及政通人和。尋日東華全體董事局成員亦一早穿着長袍玄褂到場參與儀式，原來主席馬陳家歡細個都喺文武廟附近長大，因此對該區非常熟悉，早前佢嘅小朋友升小學前，仲專程到文武廟祈求面試順利。
卓妮見董事局每位男士都身穿黑藍長袍，而女士則穿上唔同顏色嘅傳統中式長衫。馬陳家歡就話，其實之前都有訂製同男成員款式相近嘅藍色長衫，但去年請文武二帝出巡時女士們都改穿色彩較豐富嘅服飾，效果唔錯。而佢尋日一身綠色長衫上有橙色繡花，甚有秋意，原來係喺東華己酉年主席黎時煖開設嘅店舖度身訂造，布料都係師傅迎合秋祭主題挑選嘅。
鄭寶鴻勾起童年回憶
喺文武廟附近成長嘅仲有香港歷史博物館名譽顧問鄭寶鴻，佢話文武廟係該區嘅文化核心，居民都圍繞喺附近生活。而佢童年時亦會同父母喺附近散步同坐喺樓梯石級傾偈休息，佢嘅兄弟姊妹小時候亦喺文武廟旁嘅學校讀書，又懷念已消失嘅吳源記雲吞麵同小館子仁和。
至於總理何猷啟以前就經常同媽媽去文武廟，所以一啲都唔陌生，但講到着長袍就唔係好慣，笑言行路都仲好，坐低就有啲難度。同場仲有總理蔡加怡、廖偉麟、李曠怡同韋浩文等。李曠怡對文武廟都有特別回憶，事關佢十幾歲時好鍾意拎住個相機四圍影相，尤其係黑白相，仲游走各區著名景點拍照，佢話文武廟內有好多唔同擺設，無論係文武二帝像或廟內香火都可以營造出好多唔同層次喎。
卓妮