政情：抽水兵團立會「剝花生」
立法會主席梁君彥前日決定押後青年新政議員梁頌恆同游蕙禎嘅宣誓，引來非建制派強烈反彈，並揚言搞事。尋日大會開始之前已瀰漫一股大戰氣氛，部分政界中人更親身去現場「剝花生」觀戰。不過，去觀戰嘅唔係個個同立法會有直接關係，包括「兩袖清風」無政黨聯繫嘅前立法會議員「中間超人」黃成智，唔通佢冇嘢做去立法會公眾席「剝花生」睇戲過吓日辰？
黃之鋒周庭外面睇直播
尋日非建制派議員以人鏈護送游、梁二人硬闖會議廳期間，香港眾志議員羅冠聰嘅助理黃之鋒同周庭，一度企喺會議廳同外門之間嘅「抗拉布工作區」位置，見到佢哋不斷望住會議廳入面，似乎真係好想做議員入去咁喎。不過，佢哋最終都被保安趕返出外面，結果兩個人最後只能夠同社民連黃浩銘一齊睇電視直播。
另外，由游、梁二人硬闖會議廳開始，在任立法會議員時擔任建制派「班長」嘅葉國謙亦企喺二樓，神情輕鬆睇晒成個硬闖過程。據聞佢仍未退出建制派立法會議員嘅WhatsApp群組，莫非佢卸任後負責喺外圍睇水，再向會議廳內嘅建制派議員通風報信？