政情：建制冧友阻慢必入行管會
新一屆立法會開鑼後，一場又一場戰役接連展開，先有泛民主派同建制派為委員會正副主席之位爭崩頭，之後又爆出宣誓風波，最近就連一向好和平、以「分餅仔」方式處理嘅行政管理委員會（行管會）委員席位都出現競爭。據了解，建制派因為不滿泛民搵人民力量陳志全（慢必）出任行管會成員，不惜「冧友」參與行管會委員選舉，務求將慢必踢出局，免日後行管會不得安寧。
立法會內務委員會明日就會互選選出行管會、議事規則委員會、議員利益監察委員會及政府帳目委員會嘅委員。過去幾屆，泛民同建制派都會以「建制六、泛民四」嘅分餅仔方式協商出十個行管會委員。不過，由秘書處向議員提交嘅文件顯示，今屆竟然有十二個人報名參加行管會，其中建制派有八個人參選，超出原先協商嘅六人，至於泛民就協商派出慢必、陳淑莊、黃碧雲同埋莫乃光。
泛民若妥協 願維持「六四比」
有建制派議員覺得，慢必嘅議會表現非常激進，直言「搞事嘅人點可能喺一個處理鬧事者嘅委員會？」又擔心慢必會拉布或阻礙會議運作，揚言會不惜一切阻止慢必成為委員。據聞建制派初步開出條件，若泛民肯換走慢必，建制派會維持早前協商嘅「六四比」，否則會力取七至八席。另一議員話，建制派亦擔心慢必會當面質詢行管會當然主席梁君彥，所以決定除之而後快。
疑似被針對嘅慢必就話，「建制派有四十個人，只要佢哋想，全取十個位都得啦，唔使分畀我哋喇！」佢話，日前有建制派議員向部分泛民議員傳話，表達對佢出任委員嘅憂慮，佢目前冇退出選舉嘅打算，亦冇泛民要求佢退出選舉。問到明日會否拉布，慢必就話暫未有打算。老實講，今屆立法會比慢必更激嘅人比比皆是，再加上泛民少、建制多嘅情況下，就算慢必入局都阻唔到行管會嘅任何決定，究竟有冇必要去破壞長久以來嘅協商方式呢？莫非建制派要做到零風險？