中環出更：蒙德揚浸大分享收一紮菜
一般活動完結之後，主辦單位都會送紮花或者紀念狀畀嘉賓，答謝佢哋抽空出席。不過，浸會大學日前搞嘅座談會，獲邀出席同學生分享嘅信興集團主席兼行政總裁蒙德揚（David），就唔係收到花，而收到一大紮蔬菜，真係夠晒特別，啱晒着重健康嘅佢喇。
話說David下月將會獲浸大頒授榮譽社會科學博士學位，所以浸大就先邀請佢同學生分享企業社會責任與市場文化。不過，最搞笑係活動完結後，David竟然收到學生送上一紮蔬菜，佢都忍唔住會心一笑，仲喺台上跟手即刻搣咗塊生菜塞入口食添！原來個學生知道David鍾意煮嘢食，而David就笑住話夜晚可以加餸炒番個西蘭花喎。
員工可廿蚊享用按摩
座談會上，有學生問及點樣平衡社會企業責任與經濟效益時，David直言社會企業責任就算蝕本都要做，例如保障產品品質及職業安全、對環境保護及員工身心健康等，係一種企業嘅公德心，而捐錢或做義工只係其中一部分。好似佢哋約三年前開始讓員工以二十元享用減壓按摩服務，就係想員工肩頸更健康。
浸大基金董事局副主席李宗德及浸大校長錢大康都在場，原來兩人同David相識多年，本身係和富慈善基金主席嘅李宗德更係David嘅中學師兄，佢好認同David對企業社會責任嘅觀點，感慨好多人將企業社會責任當咗係一個公關技巧，但其實唔係捐錢咁簡單，係過程中顧及對社會及各方面影響，由生態到社會氣氛都要關心。
卓妮