面係人哋畀，架係自己丟。香港大學排名好似食咗瀉藥咁，跌跌不休，低處未算低，講到尾都係自己攞嚟。
呢，《美國新聞與世界報道》公布今年全球最佳大學排名榜，評估來自六十五個國家或地區共一千間大學，結果港大比舊年暴跌四十二位至一百零六位，亞洲排名亦由第五跌至第八，直頭跌到阿媽都唔認得。百年大學排位跌出百名以外，折墮成咁，幾咁可悲！
即係咁，港大近年國際排名江河日下，大家早就見怪不怪，只係估唔到會好似玩跳樓機咁自由落體啫。咁到底港大衰乜呢？據講主要係因為學術研究被引用帶來嘅影響性以及國際協作等指標，全球排名較低。鬼咩，呢啲咪一味沉迷搞政治嘅惡果囉。大學校園紛紛擾擾，容不下一張安靜嘅書桌，亦容不下一間安靜嘅科研室，部分老師唔係當官上癮，就係誤人子弟，搞政治多過搞學術，喺咁嘅環境之下，所謂研究成果有幾高水平，有幾大國際影響力，畫公仔唔使畫出腸喇啩。
好似教法律嗰位副教授咁吖，專業範疇有咩貢獻大家未必知，但係製造政治「核彈」、鼓動學生違法佔街就係人都知。佔領之亂收皮兩年嘞，佢老哥仲係不甘寂寞，周不時搞搞震刷存在感，上次立法會選舉搞乜鬼雷動計劃，害死自己友畀人噴到一面屁都唔識反省，最近立法會宣誓風波又試走出嚟搭嗲評論一番，唔知嘅仲以為佢係時事評論員添，咁搞法，仲邊有時間做學術研究吖。
最慘係呢類學棍不在少數，佢哋一個二個好似有金鐘罩護體咁，無論點濫竽充數都好，邊個掂親佢哋，邊個被扣「政治打壓」大帽子，隨時一身蟻。你話嘞，大批政棍霸住茅坑唔做事，學術水平點可能唔急墜，港大點可能唔死吖。
講起上嚟都幾諷刺，政治入侵校園，背後唔多唔少都有外部勢力嘅影子。好嘞，家陣有啲人聽晒佢哋支笛，唯恐天下不亂，結果自己變成過街老鼠唔在講，連學校嘅朵都搞臭埋，你話係咪累人累物累街坊累學校吖！
最好笑嘅係，港大國際排名一路係咁跌，有啲港大人仲好似沉醉喺殖民地時代「天子門生」、「亞洲第一學府」嘅美夢當中，殊不知今時唔同往日，莫講話新加坡、南韓等地大學排名遙遙領先，港大望塵莫及，內地嘅北大同清華亦早已後來居上。大家有冇發現，過去內地學生尤其係各省狀元以來港讀書為榮，家陣熱潮不再嘞，道理好簡單，人哋尖子學霸一係留喺國內深造，一係直接留學英、美名牌大學，香港高校一早就唔馨香喇！