《二○一三年施政報告》提出嘅全港十八區社區重點項目，部分已經獲立法會通過撥款，其中沙田區議會建議嘅活化城門河河濱就係其中之一。沙田區議會嘅地區設施管理委員會尋日開會成立跟進城門河工程嘅工作小組，區議會一向建制派當道，佢哋亦都推舉民建聯沙田區議員董健莉為召集人，點知建制派就甩轆，被泛民突襲成功爭到召集人一職。
不過，呢個工作小組負責監督工程，有乜甩漏就要孭飛，所以泛民今次是福是禍，都仍然係未知之數。
沙田區議會地區設施管理委員會尋日開會，大家討論到要就城門河工程成立小組時，泛民有議員突然發現會上泛民人數有十七人，而建制派只有十三、四人，於是就提名「傘兵」區議員、沙田社區網絡黃學禮出任召集人，挑戰董健莉。大安旨意嘅建制派此時心知不妙，就進行拖字訣，竟然投訴個投票系統出現問題，但都係拖得嗰一、兩分鐘。雖然之後部分建制派議員陸續返回會議室，但最終都係得十六人，黃學禮成功當選。
不過，監管工程係吃力不討好嘅工作，萬一到時有咩甩漏，被追究起上嚟就真係自討苦吃。有口痕友話，可能係建制派有心放個位出嚟，畀條蕉皮泛民踩都未定，等泛民仲以為執到寶喎。