政情：陸頌雄 麥美娟身高差夠萌
工聯會（工記）立法會議員陸頌雄（Michael）都係議會內嘅高人一族，同身形嬌小嘅黨友麥美娟（Alice）一齊影相時，兩人嘅「最萌身高差」尤其明顯。Alice話自己係標準身高，Michael就太高，仲提起唔少工記男黨友都係高人，另一個代表就係理事長吳秋北，仲話男人入到工記就可以抬起頭做人喎。
高佬Michael上鏡得個嘴
不過，人高都遇到難題，Michael話每逢開記者會，佢通常企喺團隊後方，好多時電視台影住前面嘅黨友時，佢就只有嘴巴出到鏡，但相信大家會認得佢個嘴喎。佢又講起太太都只係標準身高，但佢哋嘅愛情就冇受身高所限。
Michael講起太太就停唔到口，仲自爆喺水塘向太太示愛，之後去番水塘擺酒，但地點必須要行半個鐘先入到去，有位女士着住高跟鞋行咁耐，都忍唔住責怪佢，至於Alice當年咁啱整親腳行唔到，所以無緣去飲喇。