政情：阿忠出醜 幫街工登榜首
香港大學民意研究計劃公布最新「十大政治團體」認知度及評分排名，大部分認知率高嘅政團，評分都喺五十分以下，而近期因為宣誓爆粗、辱華而惹起公憤嘅青年新政，以及搞破壞倒插建制派議員枱頭五星旗嘅熱血公民，連十大政團都入唔到。不過，「沉底」超過兩年嘅政團街坊工友服務處（街工）重返十大政團，評分更加排第一，莫非因為梁耀忠（阿忠）主持立法會主席選舉做「逃兵」及主持會議搞到一鑊粥，市民畀番個安慰獎可憐佢？
馮檢基失議席 民協墊底
今次調查分為兩輪進行，首輪為上月下旬嘅認知率排名調查，第二輪就係本月十至十三日嘅支持度評分調查。結果顯示有兩名成員梁頌恆及游蕙禎當選立法會議員嘅青年新政，雖然評分唔算最低，但因為認知率不足而未能躋身十大政團之列。至於另一本土派政團熱血公民，無論認知率及評分都唔入流，未知係咪該政團議員鄭松泰知名度不足，以及喺立法會搞破壞，將建制派議員枱頭嘅五星旗倒插惹來市民不滿。
此外，因為民協前立法會議員馮檢基競逐連任失敗，民協從此喺立法會消失，認知率亦急速下跌，仲同上一次調查中榜上有名嘅學民思潮及本土民主前線齊齊跌出十大，而民協更係處於墊底位置。不過，自從本土自決派在立法會崛起後，激進泛民政團社民連及人民力量都要靠邊站，兩個政團嘅認知率唔算低，但支持度評分就分別排喺第九及第十位，分別只有三十九點六分及三十七點七分。
主持做逃兵 曝光率突增
至於上屆立法會同民協一樣都係「一人黨」嘅街工，街工阿忠今屆循超級議席順利連任，最新認知率係自一四年六月以來首次進身十大，而評分亦有五十四點三分，為評分最高及唯一達合格水平的政團。阿忠早前喺主持立法會主席選舉時做「逃兵」，之後又喺主持保安事務委員會主席選舉時，搞到個會開完都選唔到主席，最後仲賴死唔走，可能因此令佢曝光率急升。不過，點解阿忠做「逃兵」兼「甩轆」都咁高評分？唔通市民知道佢唔係主持會議嘅材料，所以畀同情分？