中環出更：怒民上門 轟漢奸黎「黑金操縱議會」
新一屆立法會一開鑼就立立亂，青年新政兩位議員梁頌恆同游蕙禎嘅宣誓風波更係沒完沒了。曾被揭發多次秘密捐款予泛民政團同立法會議員嘅壹傳媒黎智英（漢奸黎），尋日再有人到佢位於何文田嘅寓所外示威，批評漢奸黎「黑金操縱議會」。示威人士亦批評梁頌恆同游蕙禎發表唔尊重中國嘅言論，冇資格做議員。
斥游梁冇資格做議員
尋日上午約十一時，廿二名人士聲稱自發到漢奸黎寓所外示威，部分示威者更帶同小朋友到場。佢哋手持印有「黑金操縱議會、誓要鏟除黑媒」、「肥黎滾出香港」等字句嘅橫額，並大叫口號，跟住又播放《義勇軍進行曲》。之後佢哋又將矛頭指向梁頌恆同游蕙禎，批評兩人喺立法會宣誓時發表嘅言論唔尊重中國，冇資格做議員。期間有警員接報到場了解，示威人士喺中午約十二時離開，但下午一時半左右再折返示威，逗留約一個小時才離開。
針對漢奸黎嘅示威行動不絕，自今年六月十日起計，到漢奸黎寓所及將軍澳壹傳媒大樓外嘅示威行動最少有六十七次，當中自稱霸王國際集團員工及苦主嘅佔十次、正義聯盟佔三次，旅遊業界同其他人士則有五十四次。
卓妮