中環出更：潮青創新天 方平兩女拒從政
香港有過百萬潮州人，其中年輕一代都非常標青，早前香港九龍潮州公會成立咗個青委會，一班成員就喺沙田馬場舉行時事分享會，邀請發展局政治助理馮英倫做嘉賓，討論社交媒體及政治嘅關係，見一班成員咁認真聽，似乎對政治都好有興趣。卓妮見到葵青區議會前主席方平嘅兩個女方遜及方溢都在場，問佢哋有冇興趣學爸爸從政，但佢哋已經有自己一片天喇！
雖然爸爸曾經做過區議員，但方溢現時做緊首飾設計，而佢細細個嘅夢想一直都係做設計師，所以冇諗過從政。至於家姐方遜目前就做緊婚禮統籌，就算細個爸爸都有成日帶佢出去見客，想佢將來接手屋企生意，但兩姊妹見到阿爸做議員時咁忙同辛苦，梗係怕怕啦！方遜仲話，爸爸卸任區議會工作之後，最近去咗澳洲探媽媽喺嗰邊讀書嘅細妹，難怪呢日唔見方平喇。
青委會靚女成員多
講番呢個青委會唔單止成員後生，話係最多靚女嘅青委都不為過，好似負責籌辦今次活動嘅威威洗衣粉億豐行新抱洪玉芝、青委主任張詩培、「新小巴大王」女兒馬嘉暻等。同場仲有新加入嘅年輕成員林德宜都仲讀緊大學，仲係讀政治添！
林德宜話，細個嗰陣經常喺電視新聞見到外國記者採訪，好佩服佢哋四圍去反應好快，所以童年時都有諗過投身新聞行業，但後來覺得政治同生活息息相關，讀完就算唔從政一樣可以應用喺各方面，佢仲話希望繼續讀多幾年書先出嚟做嘢添。
卓妮