管治愈來愈廢 窮人愈來愈多

港府最近公布《2015年香港貧窮情況報告》，顯示去年全港貧窮人口比一四年增加約一萬。難為高官開口埋口扶貧方面取得幾大成績，實情係基層愈扶愈貧，直頭係大巴大巴咁車埋去，唔怪得大部分「東方報業民意調查」受訪者都鬧爆港府扶貧政策冇對症下藥，成效不彰，亦有唔少人認為樓價同租金太貴，係貧窮問題嚴重嘅主要原因。

唔講房屋問題猶自可，一講把幾火。人稱「劏房波」嘅發展局局長陳茂波尋日又寫網誌廢噏，話好多人以為有地就可以立即起樓係「誤區」，又話政府冇「魔術棒」可以變出土地，而又唔帶來任何影響喎。咁就好笑嘞，當初又係你哋下巴輕輕，承諾「寸土必爭」、「見縫插針」，好嘞，家陣發現自己眼高手低，就藉口多多賴得就賴，仲有冇再離譜啲吖。

其實，只要睇吓公屋建屋進度距離達標愈來愈遠，輪候上樓條龍愈來愈長，連雞棚豬欄改建嘅劏房都爭崩頭，就知香港地窮人日子幾難捱。呢，觀塘有工廈業主早排向法庭申請收回天台，二十個劏房戶被迫遷，大部分人輪公屋三五七年都未輪到，其他條件好少少嘅劏房又租唔起，有人已經打定輸數瞓天橋底。講真，類似嘅基層悲歌，喺香港真係不知凡幾。

以前成日話「知識改變命運」，讀得成書可以脫貧，家陣大學生在職貧窮人數節節上升，早就冇呢支歌唱咯。鬼咩，大學生人工廿年來幾乎原地踏步，除非你係嗰位女傑青，否則置業安居基本係癡人說夢。年輕人既冇出路亦冇希望，原本嘅社會未來主人翁淪為社會不穩定因素。上述民調顯示，大部分受訪者狠批政府未做好資源再分配，影響年輕人向上游意欲，好心班高官檢討下喇。

話時話，港府財政儲備豐厚，照計大把彈藥推行長遠扶貧措施，問題係呢個政府出名守財奴，毫無承擔，叫佢搞人人有份嘅退休保障，固然好似食咗佢隻車咁，即使小恩小惠，亦係畀得心不甘情不願，好似低收入在職家庭津貼咁，申請門檻高兼手續繁複，擺明假仁假義，故作姿態。最過分係港府小恩小惠都要算死草，連派開嘅「N無津貼」都話要取消，唔畀人鬧爆至奇喇。

一句講晒，窮人愈來愈多，皆因管治愈來愈廢，想搞好扶貧，第一步應該點做，畫公仔唔使畫出腸喇啩！