本屆特區政府施政可謂乏善可陳，若有，就是「破天荒」令港人陷入重重困局：扶貧無方，致使貧窮人口不跌反升；執法不嚴，致使禮崩樂壞，「港獨」妖孽進入立法會。回歸十九年來，今年是香港「破天荒」陷入死角之年！
一講到扶貧，特首就好像打了幾公升雞血，亢奮到語無倫次，大言炎炎咁公布天下：「過去四年的扶貧工作有理念、有方向，亦在大家的支持下卓有成效……如果大家不介意，我想再用「破天荒」三個字來形容。」阿哥，扶貧委員會嘅報告指出，本港去年貧窮人口有一百三十四萬五千，較前年增加二萬人，即使計算政府恒常現金津貼譬如綜援、長者生活津貼及生果金等，貧窮人口冇錯下降至九十七萬，之不過仍較前年增加九千三百人。
點講都好喇，貧窮線無非玩數字遊戲，老朽眼見仍有不少老人家在執紙皮，仍有人瞓天橋底，仍有人在垃圾桶搵嘢食，若然咁都叫扶貧成功，老朽就真係支持你……唔住！
阿哥，時間係最好嘅證人，原來你唔單止「呃人」，仲歪理當真理：「香港有些人反對政府起公屋」。喂！橫洲事件搞到咁大鑊，都係因為「官商鄉黑合作」唔掂，由原來萬七個公營房屋單位變成四千個，先搞到現屆政府不得不「迎難而上」，死都話要保住建一萬七千個單位，只不過係「分期」啫。講真，反對你起公屋嘅肯定唔係基層市民，佢哋等到頸長仍未上到樓，最明白扶貧最實惠嘅就係興建多啲公屋，振英哥卻突破思維框架，語言偽術之登峰造極，真係點到你唔服？
《文心雕龍》論「誇飾」有云：誇過其理，則名實兩乖。意思是說，如果誇張超過情理，就會使名聲與事實兩者不符。振英哥應要惡補《論語》，起碼會明白何謂「恥其言而過其行」，如此，說不定會「破天荒」學懂謙卑做人。