政情：周博賢出戰藝發局選舉 莫非鋪路選委會？
現屆香港藝術發展局委員嘅任期將於今年底屆滿，而登記咗嘅藝發局選民會喺下月底投票選出「十大藝術範疇」界別代表。參選過立法會體育、演藝、文化及出版界落敗嘅音樂人周博賢，嚟緊將會同演藝學院表演藝術教育主任李俊亮、作家陳慧同埋現任藝發局委員陳錦成組成連線，分別出選音樂、戲劇、文學藝術同埋視覺藝術界別代表。適逢今年年底仲有選舉特首嘅選委會選舉，莫非周博賢今次出選藝發局，係為選委會選舉作試票？
業內指文化界多泛黃選民
特首選委當中，體育、演藝文化及出版界有六十席，再分為體育小組、演藝小組、文化小組同埋出版小組各十五席。以往建制派都會成功搶攻六十席，但早前有業內人士估計，文化界中選民以「泛黃」為多，再加上喺今屆立法會選舉中，周博賢雖然落敗，但得票率明顯有所增長，足以證明非建制派要搶攻文化小組十五席亦絕非難事。話雖如此，不過周博賢本身係音樂人，而四個小組當中，只有文化小組比較多「泛黃」選民，未知佢會打算搶攻邊個小組呢？