政情：搶做大學校董 非建制爭崩頭
新一屆立法會開鑼之後，繼上星期非建制派同建制派為十八個事務委員會嘅正副主席之位爭崩頭之後，又有議員為爭做大學校董拗數。根據現行法例，立法會議員需要互選三人及五人，分別做中文大學同香港大學校董，原定喺上周五內務委員會上舉行嘅選舉，因為「海馬」殺到、掛八號風球，所以押後到今個星期五。雖然開唔成會，但據聞非建制派同建制派都已就人選做緊協調，其中非建制派更出現六個人爭一個中大校董位。
過去幾屆，中大同港大校董嘅位都係泛民同建制派以分餅仔嘅方式處理，上屆泛民可以分到一個中大校董同兩個港大校董位，今屆亦無改變。據知，非建制派喺中大校董個位爭崩頭，除咗本身做緊嘅民主黨（白鴿黨）黃碧雲，香港眾志羅冠聰、社民連梁國雄（長毛）、人民力量陳志全（慢必）、另一白鴿黨議員林卓廷同埋曾經喺中大任教嘅建築界姚松炎都有意競爭。
其中，羅冠聰就話自己都係大學生，又好關心高等教育議題，亦試過做大學校董，若果成功當選嘅話會推動擴大校董會內學生比例。
建制派亦現競爭
至於港大校董嘅競爭方面，據了解，除咗本身做緊嘅教育界葉建源、白鴿黨涂謹申有意繼續，公民黨郭家麒、毛孟靜同長毛都想加入戰團。由於葉建源係教育界代表，大家都同意佢應該佔一席，而其他兩個位就會以抽籤協商出最終人選。上屆長毛同慢必都分別突襲，希望喺唔協商之下當選，今屆佢哋都乖乖加入抽籤機制，相信出亂子嘅機會唔大。至於建制派方面，聽聞港大校董個位都幾多人爭，除咗本身做緊嘅謝偉俊，仲有新民黨葉劉淑儀。
正所謂「瘦田無人耕，耕開有人爭」，過去幾屆想出任校董嘅議員都係得小貓三四隻，點都估唔到今屆就連建制派都出現競爭，相信都係因為港大校委會風波同埋特首校監必然制等問題，令校董呢啲「閒位」熱鬧起嚟。唔知道佢哋爭成咗之後，會唔會有一番作為呢，咁就真係要拭目以待喇！