中環出更：企業傳承有法 朱鼎健拒做富二代

當日朝早阿Ken由香港經深圳搭機去海南，再飛回深圳趕返香港領獎，佢笑稱有啲暈機浪及暈車浪。公務咁繁忙，點解唔買私人飛機？Ken就話覺得唔應該縱壞自己囉！

Ken自言最唔鍾意被稱為「富二代」，寧願做「創二代」、「勤二代」，所以佢唔買遊艇及私人飛機。佢話由於父親患病，佢三十二歲時就準備接班，面對一萬四千人嘅全球最大高爾夫球場集團，佢認為只係守業唔足夠，仲要創業。依家集團已發展成為多元化嘅旅遊休閒產業，規模遠勝於接班前，Ken確係飲得杯落。

曹慰德盼與陳裕光合作

中國人經常話「富不過三代」，一代船王曹華章家族就打破呢個魔咒，現時由第四代傳人萬邦泛亞主席曹慰德掌舵。曹慰德一語道破家族企業點解咁難做，皆因家庭係講愛嘅地方，但係做生意要講錢，一家人講錢又講愛，太複雜，亦難受。佢對研究企業傳承好有興趣，笑稱將來可以同陳裕光合作。富過四代嘅得獎者仲有李錦記家族。李錦記董事李惠民話好多年輕人唔願返家族效力，李家有個唔錯嘅獨家貼士，就係用極高薪聘用，引得哄堂大笑。

卓妮

李惠民代表李錦記家族捧獎。

朱鼎健（中）接班後表現青出於藍，陳裕光（右）及寶聲集團董事長陳燿璋（左）都讚佢叻。