啱啱掠過香港、號稱今年最強嘅颱風「海馬」，造成多人受傷，不過比起家陣打到冚冚聲嘅民意颶風咯喎，可以話係蚊髀同牛髀。冇錯喇，功夫茶講緊嘅咪係私營院舍院長涉嫌性侵智障女院友獲放生，觸發針對社署嘅滔滔民意怒潮囉！
雖然話涉事院舍已被釘牌，但疑似淫狼院長連日來高調狡辯，加上該院舍被揭短短八個月有六名院友死亡，民憤可謂火上加油。廿幾個社福團體尋日緊急約見社署署長葉文娟，好快就變控訴大會，有位女士曾安排十六歲患輕度智障嘅親人入住涉事院舍半年，期間問題多多，三餐冇啖好食、院舍人手不足，部分院友要自己洗埋地洗埋衫不特止，衞生情況仲要極之惡劣，住老鼠分分鐘多過住人，最終焗住接返屋企自己照顧，佢形容「院舍好恐怖，一日唔死都唔想再去」，都咪話唔誇張。
講真，仲有幾多類似個案未被揭發，真係冇人話得埋。社署過去三年話就話進行超過五千次突擊巡查，但莫講話檢控，釘牌都未試過，所謂監管明顯只係走過場，咁搞法，院舍服務質素自然泥沙俱下，虐待性侵乜都齊。私營殘疾院舍醜聞長爆長有，社署官僚姑息養奸，助紂為虐，同幫兇冇乜分別。
正所謂亡羊補牢，家陣最緊要係堵塞漏洞。之但係你估社署點講吖嗱，對於現時二百幾間未符合發牌、只係持有豁免證明書嘅院舍，當局目標係三年內作出改善，務求全部符合發牌條件。咁即係點，即係將頭埋喺沙堆多三年，期間再有院舍出事，隻鑊邊個孭得起吖？
話時話，家陣全港三百幾間院舍之中，只有幾十間真正有牌，其餘全部都係領豁免證明書。點解當局一直縱容未符資格嘅院舍繼續營運？講到尾咪係投鼠忌器囉。鬼咩，政府投放不足，殘疾院舍宿位長期供不應求，每年有大批未獲編配津貼宿位嘅智障人士被迫轉投私營市場，如果當局有法必依，全面取締，叫呢班有需要人士去邊度搵宿位？不良業界分子就係睇通呢點，所以咪有恃無恐，為所欲為囉。就好似今次被釘牌嗰間殘疾院舍咁，被踢爆多次以「影子員工」充數逃避社署巡查，你估當局真係唔知發生咩事咩，正如有立法會議員踢爆，除咗殘疾院舍，安老院舍為壓低成本，虛報人手亦非常普遍。如果唔係官老爺一直扮鴕鳥，隻眼開隻眼閉，就唔會搞成咁喇。
《聖經》都有講喇，你的財寶在哪裏，你的心也在哪裏。港府出名善財難捨，民間呼籲增加資助殘疾及長者宿位多年，官老爺睬你都有味。再咁落去，做幾多巡查、釘牌等門面工夫都係嘥氣，悲劇只會陸續有來嘅咋！