小學雞議員宣誓搞到全城唾罵，尤其砌詞狡辯「支那」是鴨脷洲口音，把「香港不是中國」的英文披肩說是「時尚」，敢做不敢認，連涉事議員之一梁頌恆母校九龍華仁書院前校長也叫梁唔好死撐，要做個真正的「Man for others」。
流會阻梁頌恆及游蕙禎宣誓後，兩人依舊口硬拒絕道歉，又指建制派無知無聊，會「睇佢哋玩到幾時」。老朽不禁大笑三聲，阿姐，明明一個莊嚴嘅宣誓就職儀式，你亦已經簽了「確認書」，就要遵守議會嘅遊戲規則，未坐定就攞道具抗爭播「港獨」，這不是腦袋入水就是打了雞血，道理很簡單，若然你不尊重議會，其實一開始就不該去參選議員，應該繼續搞佔領，言之不文，愛講「扑嘢」愛F的，理應在旺角街頭守候黎明，這才可稱心快意，持續勇武，咁就可以玩嘢無底線，玩到白髮三千丈，依然嘴藐藐打得少，冇神經政府又吹你唔脹，到時頂多預約拘捕你，你又可把金色長髮一甩：港獨有理！抗爭無罪！其實一樣型爆！
至於「教而不善」嘅梁頌恆，一味高喊「絕不能退讓」，堅持「我哋冇做錯」，而更無厘頭嘅係話「自己輸唔起，港人亦輸唔起」，老朽又不禁大笑三聲，阿哥，你輸唔起係因為眼前本已入口嘅肥肉——高薪厚酬「尊貴議員」一職恐得而復失，係人都睇到你哋難捨議席，本想改用中文宣誓唔玩嘢，誰知畀建制派來一招「化腐朽為神奇」，以泛民最擅長之拉布、流會遏止了梁游嘅重誓！
人與人鬥，很殘酷但無法迴避。觀乎本屆立法會，開局即亂象紛呈，先來「午餐肉大戰」；老朽想起動物為了爭奪食物、領地、交配權等，常打到天昏地暗；而立法會的議事堂常年失序失控，有時甚至比動物戰爭更醜陋！老朽眼見香港不斷沉淪，唯一稍感安慰的，是可以不買票，經常在家一打開電視，就可以觀看人扮動物嘅戰爭猛片。