政情：雙料議會新丁齊「減磅」
新一屆立法會唔少議會新丁都係「雙料議員」，即同時係立法會議員同區議員。新丁要掌握立法會運作已經唔簡單，如果要兼顧埋區議會工作，能力、時間不足只會兩頭唔到岸。民主黨（白鴿黨）林卓廷（阿廷）、工聯會陸頌雄同民建聯劉國勳等多位立法會新丁都係區議員出身，踏入十月立法會正式開波，佢哋三個已經將區議會工作「減磅」。其實立法會首日大會已經立立亂，減定磅應付亂局都啱啦。
許智峯堅持唔減磅
舊年當選北區區議員嘅阿廷順利接前議員劉慧卿棒，成為雙料議員，同時要兼顧區議會同立法會工作。阿廷話，相信到時立法會同區議會兩邊嘅會議撞時間嘅機會率好高，而佢已經退出咗社會服務、勞工及經濟事務委員會，以及地區小型工程及環境改善委員會，不過就算退出咗委員會，佢都會盡量列席同關注有關議題。而佢嚟緊會同區議會商討，睇下可否遷就開會時間。
同係白鴿黨嘅雙料議員仲有本身係元朗區區議員嘅鄺俊宇，以及中西區區議員許智峯（峯鴿），佢哋兩個暫時都未有喺區議會工作上「減磅」。峯鴿話因為佢承諾過居民唔會因為入咗立法會就減少區議會工作。
劉國勳兩頭走頻撲
同阿廷一樣都係北區區議員嘅劉國勳，早喺當選立法會議員之前，已經退出咗區議會社會建設、文化及康樂委員會同社會服務、勞工及經濟事務委員會，而交通及運輸委員會、地區小型工程及環境改善委員會、地區設施管理委員會就會繼續。不過，即使減咗磅，北區同立法會始終相距甚遠，如果同一日開會都咪話唔頻撲，呢一點劉國勳都話要度一度。
本身係元朗區議員嘅陸頌雄喺區議會原本加入咗四個委員會，依家已退出咗兩個，即文康、社區服務及房屋事務委員會，同埋城鄉規劃及發展委員會。佢解釋話，自己喺區議會關注嘅都係房屋問題為主，認為喺立法會都可以向官員問到相關議題。而佢做咗兩屆交通及運輸委員會主席，亦都唔再擔任主席。人有自知之明都係好事，好過力不從心，搞到兩頭唔到岸，仲要被封大懶蟲就唔好啦！