中環出更：阿鼎做番執業律師 免淪笑柄
本身係律師嘅立法會議員周浩鼎（阿鼎），喺參加年初立法會新界東補選時，曾被指摘只係受聘於企業，唔係執業律師，唔能夠上庭打官司。翻查資料，其實阿鼎已經做番執業律師，佢接受查詢時話「啲友之前亂咁噏，依家一嘢粉碎」，唔通阿鼎好介意被人話佢唔係律師？
阿鼎話，佢喺六月已經離開有關企業，七月加入律師行做番執業律師，用行動證明自己嘅資格。佢話，法律界人士都好清楚件事，指摘佢嘅人係無知，至於未來接幾多案件，就要睇吓時間兼唔兼顧到，但一定會以議會工作為重。
打過司法覆核案
阿鼎又提到，佢早喺擔任區議員前，已經做過執業律師，仲打過司法覆核案件，嗰時代表部分早年被停職嘅警員，嘗試透過司法覆核，要求推翻紀律聆訊嘅決定，但後來上訴庭以訴訟過咗時限同不能追溯過去嘅原則，判警員敗訴。
卓妮