公共設施通道照顧殘障人士係常識，港府自己都識宣傳「上落無障礙，出入更自在」，點知原來噏下就算，咁小事都做唔到，唔怪得畀人叫「冇神經政府」喇！
話說港鐵新建嘅觀塘線延線聽日通車，其中何文田站遠離人口密集嘅何文田邨及愛民邨，街坊必須行經全長一點二公里嘅行人天橋到達車站。本報記者實地視察發現，無論係連接天橋地面出入口，包括公屋範圍或行人路上，定係天橋嘅升降機外，全部都設有失明人士引路徑，唯獨整條天橋嘅橋面冇任何引路設施，失明人士全程要自行用拐杖探路，睇見都牙煙，你話係咪靠害吖。
不可不知，失明人協進會喺正行人天橋旁邊，附近經常有好多視障人士出入，對佢哋嘅需要視而不見，點都講唔通。而最離譜嘅係，有失明人士投訴天橋「失徑」，港鐵即時話唔關佢哋事，天橋由政府管理，有關設施係根據政府嘅設計標準同規定，又話引路徑唔係唔起，只係遲啲先起喎。
講真，其實《殘疾歧視條例》實施超過廿年，當中訂明建築物必須為殘疾人士提供適當通道，否則即屬歧視，路政署作為工程委託方，無論如何難辭其咎。呢，有失明人士組織揚言如果當局唔盡快亡羊補牢，唔排除向平機會作出投訴，怕且路政官僚呢鋪吟詩都吟唔甩咯。
話時話，今次事件只係官老爺對殘障人士冇心冇肺嘅縮影。港府四年前提出「人人暢道通行」計劃，為各區二百五十個公共行人通道加建無障礙設施，話要將香港打造成無障礙城市喎，弊在講就天下無敵，做就有心無力，四年過去，真正落成嘅項目不足兩成，部分工程甚至拖到依家都未見影。至於起好嘅亦未必切合殘疾人士需要，有行人天橋明明本身有斜道，竟然喺安裝升降機後拆除，完全冇諗過升降機一旦維修保養，殘疾人士點樣上落。
見微知著，官老爺連興建無障礙通道咁簡單嘅事都搞到甩甩漏漏，唔湯唔水，證明佢哋根本係敷衍了事，完全冇將用家感受放喺心上。又好似增加復康巴士服務咁吖，長期供不應求，明明增加供應只係舉手之勞，偏偏當局長年闊佬懶理，關人個關，家陣每年都有逾萬宗電召個案被拒，港產官僚想唔認麻木不仁都唔得。
一句講晒，當官不為民作主，不如回家種紅薯，特別係弱勢群體，政府唔幫佢哋邊個幫吖。可惜大家見到嘅現實係，殘疾人士「走投無路」，護老院虐老醜聞不絕，智障人士院舍亂象叢生……到底官老爺知唔知個「醜」字點寫o架！