政情：公民講場：社署補鑊太遲 院友「再別康橋」

葵涌私營殘疾院舍「康橋之家」先有原院長張健華涉嫌性侵智障女院友獲撤銷起訴，其後又被揭發今年首八個月已有六名院友死亡，喺巨大輿論壓力下，社會福利署拖到前日終於將康橋釘牌。港府三年前已實施殘疾院舍發牌制度，但係社署等到六條生命逝去先執法，社署署長葉文娟與其死撐釘牌決定唔係亡羊補牢，不如盡早認錯同改善問題好過啦。最慘嘅係受影響嘅七十多名院友，因為社署後知後覺，搞到要喺短時間內「再別康橋」搬去其他院舍，今次除咗葉文娟要孭鑊外，勞工及福利局局長張建宗都責無旁貸。