政情：焗蛋糕爆爐碎玻璃 梁繼昌差啲炸死
尋日掛八號風球，雖然朝早颱風未係最近香港，但會計界立法會議員梁繼昌（Kenneth）屋企已經爆玻璃，但就唔係個窗爆玻璃，而是廚房個焗爐，爆到玻璃碎散落一地。Kenneth喺社交網站上留言，講笑話估唔到颱風未殺到，就差啲被炸死。
疑恒溫器故障致過熱
因為打風，Kenneth同太太就留喺屋企，本來諗住兩口子焗個香蕉蛋糕，打發吓時間，點知廚房突然傳出聲響，佢哋入廚房後發現原來係焗爐玻璃爆裂，成地都係玻璃碎，香蕉蛋糕仲變咗燒焦蛋糕，好彩係佢同太太都冇受傷。
Kenneth話，呢個德國製入牆式焗爐係貴嘢，用咗幾年，維修過兩三次，啱啱星期一先整好。佢估計可能係恒溫器有問題，令焗爐過熱，引致爆玻璃。佢又話，只係維修完幾日，冇諗過咁快又再壞過，暫時未知係咪買一個新焗爐，定係要求免費再維修。總之蛋糕焗燶咗就冇得食，惟有睇吓書消磨時間。