政情：新東 九西隨時補選 立會敗將等執雞

據了解，政府並唔介意因禠奪兩人議員資格而觸發補選，亦有舉行補選嘅準備，因為立法會過去曾多次舉行補選。根據過去補選經驗，最終只會成為建制與傳統泛民嘅對決，但現時兩個議席均屬於本土派，所以傳統泛民會否出選仍然係未知之數。不過，傳統泛民嘅選票未必能夠過戶畀本土派，所以傳統泛民決定唔出選，補選將會對建制派有利。

泛民本土爭票 建制或得利

然而，若傳統泛民決定落場爭位，又會同本土派分薄票源，所以外界估計建制派有能力憑補選而贏得議席。不過，建制及傳統泛民雙方亦有唔少合適人選，相信補選發生時將有一場惡鬥。

新界東方面，雖然以千票之微落敗嘅方國珊話唔會再參選，但新界東一向競爭激烈，潛在人選亦唔少。好似連任失敗嘅工聯會鄧家彪早前已表明隨時預備參加補選，同樣連任失敗嘅新民主同盟范國威亦曾講過有重返議會嘅準備。至於本土派學者「國師」陳雲亦可能再參選。

加入戰團博翻身 進入議會

九龍西方面，在超級區議會落敗嘅工聯會王國興或會再次轉區，但由於工聯會喺新界東有頗大機會出選，相信派人參選兩個選區機會較低。除咗工聯會，建制派仍有唔少人選，例如民建聯油尖旺區議會主席葉傲冬，早前選舉佢排喺議員蔣麗芸名單嘅第二位。至於「去田北俊化」後嘅自由黨亦已回歸建制，所以喺新界東落敗嘅深水埗區議員李梓敬亦係潛在人選之一。

非建制方面，以九龍西作為「老巢」嘅民協，或者會借補選一改目前喺立法會毫無代表嘅尷尬，其中轉戰新界西落敗嘅前議員馮檢基或會再次披甲上陣。如果一旦補選，睇嚟無論邊個陣營都有可能執到死雞進入議會，不過呢啲不必要嘅補選，講到尾都係浪費公帑囉！