中環出更：名人鼓勵小朋友 加入制服團體
今時今日嘅小朋友為咗入到好學校，個個練到一身好武功，入水能游出水能跳都係等閒事，但係興趣班排到密一密，係咪就真係可以突圍而出呢？早前卓妮喺一個活動上見到身兼香港女童軍總會副會長嘅莎莎國際副主席郭羅桂珍，佢就反而覺得要畀小朋友參加制服團體，學習到獨立及團體精神。
郭羅桂珍嘅孫仔今年已經四歲，唔知又有冇好似其他小朋友咁參加一大堆興趣班？郭太就反而覺得參加制服團體對小朋友成長更有幫助，事關穿上制服除咗有型之外，仲可以學習到獨立及團體精神，培養好正面積極的態度，之後學咩都事半功倍喇！所以佢嚟緊都諗住幫孫仔報名參加女童軍轄下、男女都可以參與嘅「快樂小蜜蜂」計劃。
講番香港女童軍今年成立一百周年，早前更為十二月舉行嘅國際大露營舉行啟動禮。香港總監李周美枝就話，中學時都參加過女童軍，雖然依家未必記得點用繩結去搭棚，但就話自己對急救技術最擅長。佢仲話，女童軍對佢影響好大，好似以前營長會畀好大自由度班女童軍，放手畀佢哋去嘗試統籌活動及發揮，令後來佢教自己個仔時，都採取同一方針，放手畀個仔去試吓想做嘅嘢。
李周美枝：提升抗逆能力
李太又覺得，依家香港啲小朋友過分受父母溺愛，個個喺溫室長大，缺乏自律自立，制服團體就可以訓練到佢哋，提升小朋友面對逆境能力，成長過程自然更開心。名譽副會長方劉小梅就曾經隨女童軍到訪內地，認為參加制服團體可擴闊年輕人視野，對佢哋人生都好有幫助。
卓妮