呢排香港好似撞邪咁，日日家嘈屋閉，淨係立法會宣誓都搞到開拖咁滯，市民想耳根清淨都唔得。好彩，喺世道紛擾下都有好人好事發生，一單活肝捐贈嘅溫情新聞，證明呢個世界真係有無私大愛存在，好值得畀個Like o架。
係咁嘅， 聖公會聖三一堂中學前校長因為急性肝衰竭，必須於兩星期內換肝續命，可惜苦苦等候都冇合適肝臟，正當時間一分一秒溜走之際，終於傳來好消息，該校副校長嘅太太決定無私捐肝。經過醫護人員十二小時努力，手術順利完成，目前兩人喺深切治療部留醫，副校長太太已經甦醒，而前校長雖然昏迷，但維生指數正常，希望好快就聽到佢康復嘅好消息喇。
正所謂，救人一命勝造七級浮屠。道理個個都識講，真正做到有幾多人吖？莫講話本港嘅死後器官捐贈數字一直偏低，活體器官捐贈有一定風險，數字更加少得可憐，何況捐贈者同受贈者並無血緣關係，只因丈夫曾經係前校長嘅高足，太太為咗代夫報恩而冒險捐肝，真係好令人感動同佩服，亦證明前校長春風化雨，同學生感情深厚，種善因得善果。
你知啦，家陣嘅社會愈來愈暴戾，愈來愈多爭拗，正能量買少見少，今次事件凸顯中國人尊師重道、飲水思源嘅傳統美德，唔讚點得吖。大家有眼見，時下部分後生仔郁啲就衝擊，郁啲就追住師長嚟鬧，有幾何識得尊師重道呀。前排有位女警產後死亡，本來係悲劇，點知竟然有人欣喜若狂，冷血到冇朋友。仲有嗰啲立法會議員，唔認自己係中國人都未夠，仲要出言侮辱所有中國人，點識得乜叫飲水思源吖。所以話，如果多啲人發揮無私大愛精神，包保社會都和諧啲，爭拗都少啲。
講開器官捐贈，香港真係要加把勁咯。家陣全港有二十餘萬人登記成為器官捐贈者，只佔人口比例百分之三，雖然經過早前中大生朗朗換心事件後，登記數字略有增加，但實際上每百萬名港人只有五點四人死後捐出器官，比例遠低於歐美等先進國家，以致部分病人等唔切移植手術含恨而終。其實，人死如燈滅，點解唔喺死後捐贈器官呢？既可以遺愛人間，又可以令生命得以延續，一舉兩得，何樂而不為？
當然啦，一個巴掌拍唔響嘅，香港捐贈器官數字之所以長期處於低水平，同港府唔重視有關。可能當局都知衰啩，最近話要加強推廣，除咗計劃將器官捐贈加入通識科課程，仲話會研究「交叉器官捐贈」添。咁就唔好得個講字，快啲坐言起行喇！